தேன் உறிஞ்சும் வண்டுகளின்
கொடுக்குகள் முறியும் ஓசை
மாலை நேரங்களில் நீங்கள்
மதுக்கோப்பைகளுடன் தள்ளாடுகையில்
பின்னணியில் ஒலிக்கும் கரோக்கியாக இருக்கலாம்,
கேட்டுக்கொண்டே
இன்னும் சில மிடறுகள் விழுங்குங்கள்…
அயல்மகரந்தச் சேர்க்கையில்
கருவுறுதலுக்காக காத்திருக்கும் தாவரங்கள்
பூப்பெய்தாமலே மடியும் போது
எழும் மரணத்தின் வாசம்
உங்கள் அறையெங்கிலும் கமழும்
பெர்ப்யூமை ஒத்திருக்கலாம்,
அறையோடு நிறுத்தாமல்
உடலுக்கும் கொஞ்சம்
வாசனை தெளித்துக்கொள்ளுங்கள்…
முப்போகம் விளைந்த வயல்களின் நடுவே
மூன்று குச்சிகளை ஊன்றி
வரப்புமேடுகளை பெளண்டரி லைனாக்கி
விளைநிலங்கள் எல்லாம் விளையாட்டு நிலமான பிறகு,
மழைக்காடுகளில் ரிசார்ட்டுகள் கட்டி
தேன்நிலவில் சிற்றின்பம் பருகிக் கொண்டிருங்கள்…
நீங்கள் கவலையுறுமளவிற்கு
இன்னும் எதுவும் நடந்துவிடவில்லை…
மழைக் காதலன்...
மழைப் பூக்கள்... 